Minni kavi á Norðasta Horni

Fyri okkum, sum búgva á Norðasta Horni er greitt, at vit hava búsett okkum hægri enn havnafólk flest. Hetta er eyðsýnt um veturin, tá kavin kann liggja rættuliga tjúkkur og hálka plágar vegirnar í býlinginum, meðan onki følv er heima í býnum.

Teir hálu vegirnir og liggjandi kavin er oftani darvandi fyri ferðsluna til og frá Norðasta Horni og higartil hevur ikki eydnast at fáa skipa eina nøktandi kavarudding fyri borgararnar her úti.

Kann ikki lova, at tað skal fara at kava minni á Norðasta Horni, men ein av uppgávununum í komandi býráðssetu verður at at fáa burturbeint meira av kava, soleiðis, at íbúgvarnir á hesum hægst liggjandi býlingi í Havn hava minni av kava at dragast við um veturin. Væl vitandi at kavarudding er eitt kostnaðarmikið punkt á skránni hjá Býráðnum, so er mín meting, at vit eiga at raðfesta hetta hægri komandi árini, tí hetta hevur eisini avgjørt nakað við trivnað og trygd hjá borgarunum at gera.

Tað er umráðandi, at vit halda góðu kósina fyri trivnað og skilagóða býarplanlegging, sum hevur verið seinastu valskeiðini. Við at velja Javnaðarflokkin tryggjar tú, at kósin verður fylgd og við at velja meg í Býráðið tryggjar tú, at arbeitt verður fyri hesum. Valið er títt!

Maria Hammer Olsen, býráðslimur

Valevni fyri Javnaðarflokkin til Tórshavnar Býráð

At búgva, vera barn og gerast eldri í Havn

Í valstríðnum til kommunuvalið hava nógv ymisk viðurskifti verið frammi. Skal her líka tríva í aftur nøkur av mínum hjartamálum, sum eg kundi hugsa mær at fingið loyvi at gjørt meira við komandi valskeið.

1.     Bústaðarviðurskiftini

Havnin skal vera fyri øll. Øll skulu kunnu búgva í Havn. Eisini tey við lágum inntøkum, støk, stakir uppihaldarar og tey við serligum tørvi. Havnin skal eisini verða plássið sum útisetar stremba at venda heim til.

Tað krevur so, at kommunan tekur stig til, saman við Húsalánsgrunninum í nýggja haminum, Bústaðir, at fara undir at gera bíligar íbúðir, bæði leiguíbúðir og lutaíbúðir. Møguligt skal eisini vera hjá teimum, sum vilja hava sítt egna grundøki at byggja á, at fáa fatur á einum slíkum.  Á borgarafundi í Kollafirði var t.d. ongin ivi um, at grundøkir hava fremstu raðfesting í bygdini. Hetta skal farast undir at skipa, eisini við tí í huga, at møguleiki skal verða fyri øðrum slagi av íbúðarbygging enn sethúsum í Kollafirði og útjaðaranum í kommununi.

2.     Eldraøkið

Landið leggur eldraøkið út til kommununar at umsita, allarhelst longu í 2014.

Her má kommunan vera klár at yvirtaka, og her er umráðandi at fáa gjørt ein veruligan eldrapolitikk, sum byggir á nýhugsan.

·       Vit eru errin av Heilræðið (heimavitjunartænastan), Tilhaldinum og tilboðnum um fimleik til eldri borgarar í Badmintonhøllini. Hetta eru átøk, sum skulu stimbrast og mennast.

·       Boðanesheimið fer væntandi at nøkta røktarheimstørvin, og verður kanska seinasta røktarheimið av sínum slag, sum bygt verður í kommununi. Tørvur er á fleiri tilboðum, sum liggja millum tað at búgva heima og búgva á røktarheimi. Hesi tilboð skulu í stóran mun verða við til at fyribyrgja, at tørvurin á røktarheimsplássum verður so stórur.

3.     Barna- og ungdómsviðurskifti

Nýhugsan og nýskapan blómar innan skúlagátt, frítíðarskúlaøkið og barnagarðsøkið.

Úr rúgvuni kunnu vit nevna

·        Frítíðarskúlan í Havnadali – har serligur dentur verður lagdur á náttúruna og djórahald.  Havnadalur er ein perla fyri børn. Tað, sum har fyrigongur, er ein sólstrálusøga. Karmarnir eru tó ov vánaligir og hesir skulu bøtast. Nógvar eldsálir eru, sum kunnu koma við hugskotum. Kommunan skal taka tey í álvara og skapa karmarnar.

·       Kommunuskúlin og tónleikaflokkurin. Virkisfýsnar lærarakreftir sum skapa nakað stórt í góðum samstarvi.

·       Samstarvið millum skúla og útjaðara, m.a. Dímunarverkætlanin har fleiri lærarar úr skúlanum skiftast um at undirvísa í Dímun og har eisini undirvíst verður via Skype. Kann leggja lunnar undir øðrvísi hugsan innan undirvísing. Bygdarmenning mitt í Havn.

·       Fótbóltsflokkurin  í Kommunuskúlanum– nógv umdiskuteraður, men ein nýhugsan og nýskapan, sum eisini kann leggja lunnar undir alternativan undirvísingarhátt. Ein spennandi háttur at møta teimum ungu, har tey eru og har teirra áhugi liggur og samantvinna hetta við undirvísing, so meira fæst burturúr á øllum økjum. Her er tað bara hugflogið (og kanska onkur stirvin lóg ella kunngerð) sum setur avmarkingarnar.

Nøkur fá dømi um tann kreativitet og tað dirvi, sum finst á økinum, og sum kommunan jaligani kann stimbra og kveikja undir, so Havnin eisini er staðurin har borgararnir stremba eftir, at teirra børn skulu ansast og ganga í skúla.

Við Javnaðarflokkinum á odda eru skapt nógv úrslit á hesum økjum, og við at velja Javnaðarflokkin tryggjar tú, at kósin verður fylgd – og við at velja meg, fært tú ein sum vil arbeiða fyri hesum komandi árini.

Maria Hammer Olsen, býráðslimur

Valevni fyri Javnaðarflokkin til býráðsvalið 13. november.

Tú kanst lesa meira um mínar valtankar á  http://mariahammerolsen.blogspot.com

Ein rukka og onnur

Ójavnt er hvussu rukkurnar seta sín dám á útsjóndina, so hvørt sum vit eldast. Summi berjast ímóti og fáa tær slættaðar, so aldurin ikki sæst so væl. Øll vilja vit tó fegin eldast, tí alternativið til at gerast gamal er ikki so freistandi. Tí eiga vit eisini at gera okkum greitt, hvørjar møguleikar vit vilja hava, tá vit gerast eldri og stinga út í kortið, hvønn eldrapolitikk kommunan skal hava komandi árini.

Greitt er, at komandi ættarliðini fara at hava heilt onnur ynskir og krøv um møguleikar og tilboð, sum tað almenna skal fyriskipa. Landsmyndugleikarnir hava meldað út, at sokallaða eldraøkið skal umsitast av kommununum um eitt ár ella so, og sjálvt um man kann ivast í, hvussu skilagott tað er, er sera umráðandi at Tórshavnar kommuna beinanvegin fer at raðfesta, at fáa gjørt ein framtíðar eldrapolitikk. Tað eru gjørd arbeiði, sum lýsa økið, m.a. sonevnda eldraálitið, men neyðugt er at fáa slík álit og onnur góð uppskot umgjørd til ein veruligan eldrapolitikk, sum greitt fyriskrivar, hvussu Tórshavnar kommuna í framtíðini skal raðfesta síni átøk innan eldraøkið.

Mítt egna ættarlið og tey komandi fara at tørva nøkur heilt onnur átøk enn tilboðini, sum eru í dag. Vitanin, sum er á økinum, eigur at innganga í framtíðarinnar eldrapolitikk.

Tórshavnar kommuna hevur í fleiri førum verið undangongu kommuna á eldraøkinum og er  framvegis einasta stað, sum hevur íverksett uppsøkjandi tænastuna, Heilræðið. Ein skipan, sum tað aðrastaðni frá finnast haldgóð prógv fyri, er við til at økja lívsgóðskuna hjá teimum, sum eldast og sum er ein fíggjarligur fyrimunur bæði hjá landi og kommunu. Havnin skal eisini á eldraøkinum verða á odda og vísa á haldgóðar loysnir til frama fyri tey, sum búleikast í býnum.

Eldraíbúðir, tilhald, vitjunartænasta, mattænasta, røktarfyriskipanir, dagtilhald, røktaríbúðir, háskúlatilboð, undirvísing, endurvenjing, stimbran...... ella hvat øll hesi átøk kallast: Hetta skal alt verða ein partur av einum virknur eldrapolitikki í Tórshavnar kommunu.

Við Javnaðarflokkinum á odda í høvuðsstaðnum, kann hetta gerast veruleiki og við at velja meg á býráðsvalinum 13. november, tryggjar tú ein at arbeiða fyri einum virknum eldrapolitikki.

Maria Hammer Olsen, býráðslimur

Valevni fyri Javnaðarflokkin til býráðsvalið 13. november

Nudistalega yviri við Strond

Komandi valskeið eiga vit, at gera enn meira fyri at menna ferðavinnuna í høvuðsstaðnum.

Tað eru nógvir ymiskir tættir í ferðavinnuni, og skulu vit náa málsetninginum hjá Ferðaráðnum, so eru neyðugt at privatir leikarar og almennu myndugleikarnir taka fleiri felags tøk fyri at lyfta nakrar av tættunum fram á leið. 

Ein av hesum tættum er kamping, sum hevur vundið nógv upp á seg seinastu árini. Í Havn hevur kommunan fyri fleiri árum síðani gjørt eitt kampingpláss yviri við Strond, beint niðanfyri nýggja Boðanesheimið. Hetta er ikki dagført í tann mun, sum neyðugt er fyri at lúka tíðarinnar krøv, og sigast kann, at hetta pláss er eitt slag av øvugtari nudistalegu: Kampistarnir eru væl ílætnir, tí yviri við Strond sigst vera eitt tað kaldasta plássið í Havn, - men kampingplássið er spillnakið. Vit kunnu ikki liva upp til tann standard, sum grannalond okkara hava á kampingplássunum, og tað skal vera okkara minsta krav, at liggja á sama støði sum tey.

Við einum góðum kampingplássi gera vit umstøðurnar hjá teimum kampistum, sum koma hendan vegin, munandi betri. Vit kunnu eisini bøta um møguleikarnar hjá innanlands ferðavinnuni, soleiðis at nógvu kampingvognarnir her á landi kunnu koma til Havnar.

Ferðavinnan gevur møguleikar fyri ”sesong-arbeiðsplássum”, sum ein høvuðsstaður eisini hevur nógv brúk fyri. Her er møguleiki at blanda saman arbeiðspláss til pensionistar, sum kunnu forvinna avmarkaða upphædd, arbeiðspláss til lesandi í teirra summarferiu og arbeiðspláss til fólk við skerdum førleikum – møguleikarnir eru nógvir.

Tílík pláss kunnu verða skipaði á ymsan hátt og ikki er vist, at kommunan skal standa fyri rakstrinum, men kommunan má verða við til at skapa karmarnar, so landsins besta kampingpláss liggur í Havn.

Við Javnaðarflokkinum á odda eru oasirnar í býnum vorðnar fleiri og hesum nýtir ferðavinnan eisini gott av. Javnaðarflokkurin kann fremja fleiri úrslit á hesum økinum eisini og hetta kanst tú verða við til at stuðla við at velja Javnaðarflokkin til Býráðsvalið – og við at velja meg tryggjar tú ein, sum vil arbeiða fyri hesum.

Maria Hammer Olsen, býráðslimur

Valevni hjá Javnaðarflokkinum til býráðsvalið 13. november

Gøtunavn í Havn?

Kann man búgva 12 ár í Havn og framvegis vera eitt gøtunavn – bara tí man kemur úr Gøtu?

Alt gott um tað, men havi altíð kent meg vælkomnan í Havn og júst hetta at vera rúmligur, er so avgerandi neyðugt fyri ein virknan høvuðsstað. Her skal verða rúmd fyri øllum. Tá bygdarmenningin ikki røkkur til, so skal Havnin verða staðurin, har ein kann fara til, og vera við til at skapa tað fólksliga margfeldni, sum longu nú eyðkennir býin.

Tað setir krøv til tey, sum skulu stíla fyri, - til tey, sum komandi árini skulu mynda Tórshavnar býráð.

Umráðandi er, at tey eru við til at skapa møguleikar fyri, at øllum kann standa í boði at fáa nakað at taka hond í ella takast við og fáa møguleikan at fáa tak yvir høvdið fyri ein penga, sum herðarnar kunnu bera.

Tað er eisini umráðandi, at vit í Havn hava eitt gott útboð av íbúðarmøguleikum til tey, sum hava serligan tørv; íbúðir, har serlig atlit kunnu takast.

Tað er longu nú klárt at fara undir at byggja slíkar íbúðir á Óðinshædd í Eysturbýnum. Kommunan er klár. Hesar íbúðir liggja nærindis røktarstovnunum og til ber at gagnnýta ymsar hentleikar har, soleiðis at ikki er neyðugt at byggja alt av nýggjum. Kann verða lagamanni, at tey við serligum tørvi kunnu brúka eitt nú fysio- og ergoterapi, kalliskipanir, matskipanir o.t., sum eru nærindis.

Tórshavnar kommuna er so mikið stór og framskyggin, at hon megnar at lyfta hendan tørvin á ein virðiligan hátt. Javnaðarflokkurin hevur tað sosiala medvitið til at skapa úrslit – eisini á hesum økinum.

Velur tú Javnaðarflokkin til Býráðið, tryggjar tú framhaldandi úrslit á hesi leið og við at velja meg tryggjar tú ein at arbeiða fyri hesum!

Maria Hammer Olsen

Býráðslimur og valevni hjá Javnaðarflokkinum til kommunuvalið

Feys reyp!

Javnaðarflokkurin hevur framt nógv úrslit seinastu valseturnar í Býráðnum í Havn. Listin yvir avrikini er alin langur, - og tað er ikki reyp, hvørki vanligt reyp ella feys reyp.

Úrslit verða framd í góðum samstarvi við onnur, gamaní, men javnaðarflokkurin hevur sitið við róðrið og ein sterkur javnaðarflokkur skal til, fyri at verða tann, sum stingur út í kortið og leggur leiðina.

Komandi setuna eru nógvar spennandi avbjóðingar. Vit skulu alsamt arbeiða við at fáa meira lív í miðbýin, sjálvt hjartað í býnum. Her skulu gerast fleiri átøk fyri at fáa pulsin ordiliga at sláa. Vágsbotnur er eitt økið, sum lív er komið í aftur seinastu árini, og her kunnu átøk gerast fyri at fáa pulsin enn meiri upp. Á Kongabrúnni eru gjørdar íløgur og umstøðurnar eru nú batnaðar munandi. Talan er um eitt sera spennandi øki, sum umfatar havnalag og Tinganes og eru fleiri uppskot frammi um, hvussu pulsurin kann fáast upp her eisini.

Tað fyriliggja nógv uppskot, nógvir tankar og nógvar skitsur og hvør havnarborgari hevur sína meining um, hvussu gerast skal, fyri at fáa lív aftur í miðbýin. Vit kunnu ikki fylgja teimum øllum og øll kunnu ikki fáa síni ynski uppfylt, - tað er púra greitt. Men sum politikarar er tað okkara uppgáva, at taka yvirskipaðar avgerðir, gera raðfestingar av tí leið, vit skulu leggja fyri miðbýin. Tað verður ikki gjørt eftir einum ári ella einum valskeiði, - men um leiðin er løgd, so kann byggjast víðari alla tíðina innan tær útstungnu býarskipanarligu rammurnar og innan fyri tær fíggjarligu rammurnar, sum býurin til eina og hvørja tíð kann bera.

Politikkur er at vilja. Politikkur er at raðfesta millum nógvar góðar tankar og nógv góð hugskot, so tað besta fæst burturúr. Politikkur er at fremja úrslit. Við Javnaðarflokkinum eru framd nógv úrslit í Tórshavnar kommunu, og tú kanst tryggja framhaldandi góð úrslit fyri býin við at velja Javnaðarflokkin á býráðsvalinum. Við at velja meg, tryggjar tú ein at arbeiða fyri hesum úrslitum.

Maria Hammer Olsen, býráðslimur

Valevni til býráðsvalið fyri Javnaðarflokkin

Norðasta Horn í býráðið

Vit arbeiða fyri alla kommununa, - men tað kann hava ein týdning at útjaðara býlingarnir eru umboðaðir í býráðnum.

Tað er gott at búgva í Havn. Tað er gott at búgva á Norðasta Horni, sum er ein av útjaðara býlingunum í Havn, - eitt niðurseturøki, sum liggur eitt sindur burturfrá og sum stórt sæð er uppbygt av sethúsum . Tó so vit hava okkara frálíka býlingshús, sum í høvuðsheitum rúmar okkara dagansingarstovni. Har verða okkara børn passaði, tá tey eru smá. Tey ungu hava í hesum valskeiði fingið eitt gott ungdómstilboð á Norðasta Horni. Ungdómshúsið varð sett á stovn í býlingshúsinum. Hetta er eitt frálíkt høvi hjá yngra partinum av okkara ungdómi at hittast um kvøldarnar, - tá tey smáu eru farin til hús. Partur av býlingshúsinum er innrættað soleiðis, at hetta ber til. Tey ungu, sum áður einki tilboð høvdu á Norðasta Horni um kvøldarnar, hava nú ungdómshúsið at savnast í.

Tað er umráðandi í komandi valskeiðið at hetta góða tilboð kann halda fram og verða styrkt. Eisini eiga vit at fara at hyggja nærri eftir, hvussu býlingshúsini kunnu gerast enn virknari partur av lívinum í teimum ymsu útjaðarabýlingunum, eisini á Norðasta Horni. Hugsast kann, at tey meira tilkomnu og eldru fólkini á Horninum kunnu fáa gagn av býlinghúsinum. Hugsast kann t.d. at Tilhaldið fyri pensionistar og tilkomin fær ”satelittar” runt um við møguleika fyri nøkrum tiltøkum fyri tey, sum búgva í lokaløkinum.

Í samband við átøk, sum eru í kommununi, eigur kommunan at gera serlig tiltøk úti í býlingunum, fyri at styrkja felagskensluna í økinum. Hetta hevur sjálvsagt stóran týdning fyri trivnaðin. Eigarafeløgini hava ætlaninir fyri teirra øki, sum kommunan kundi stuðlað.

Nú nevni eg einki um bygdirnar, sum hoyra til kommununa, men her kunnu áður nevnda eisini verða ein møguleiki. - Kommunan hevur í valskeiðinum sett á stovn fleiri ungdómstilboð m.a. í Nólsoy.

Við Javnaðarflokkinum á odda eru úrslit skapt, eisini á hesum økinum. Við at velja Javnaðarflokkin á kommunuvalinum, tryggja tú, at tað framhaldandi koma úrslit, - og við at velja meg tryggjar tú ein at arbeiða fyri hesum úrslitum.

Maria Hammer Olsen, býráðslimur

Valevni fyri Javnaðarflokkin til Tórshavnar býráð